ಬೆಂಗಳೂರು: ರಾಜಾಜಿನಗರದ ನಿವಾಸಿ ಎಸ್. ಇಂದುಶೇಖರ್ ತನ್ನ ಕುಟುಂಬದ ಏಳು ಮಂದಿಯನ್ನು ಭೀಕರವಾಗಿ ಹತ್ಯೆ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಕೊನೆಯ ಎರಡು ಮೃತದೇಹಗಳು ಶಿರಾಡಿ ಘಾಟ್‌ನ ಅರಣ್ಯ ಪ್ರದೇಶದಲ್ಲಿ ಸೋಮವಾರ ಪತ್ತೆಯಾಗಿವೆ. ಇದರೊಂದಿಗೆ ಹತ್ಯೆಯಾದ ಏಳೂ ಮಂದಿಯ ಮೃತದೇಹಗಳ ಪತ್ತೆ ಕಾರ್ಯಾಚರಣೆಯನ್ನು ರಾಜಾಜಿನಗರ ಠಾಣೆ ಪೊಲೀಸರು ಸಂಪೂರ್ಣಗೊಳಿಸಿದ್ದಾರೆ.
ಆರೋಪಿ ಇಂದುಶೇಖರ್‌ನ ಬಾಮೈದ ಶಂಕರ್‌ (44) ಹಾಗೂ ಆತನ ಪತ್ನಿ ನಳಿನಿ (29) ಅವರ ಮೃತದೇಹಗಳು ಪತ್ತೆಯಾದವುಗಳಾಗಿವೆ. ಅದೃಷ್ಟವಶಾತ್ ಈ ದಂಪತಿಯ 11 ವರ್ಷದ ಪುತ್ರ ಬದುಕುಳಿದಿದ್ದು, ಪ್ರಕರಣದ ಪ್ರಮುಖ ಸಾಕ್ಷಿಯಾಗಿದ್ದಾನೆ. ನವೆಂಬರ್ ಮೊದಲ ವಾರದಲ್ಲಿ ಶವಗಳನ್ನು ತಂದು ಬಿಸಾಡಿದ್ದ ಆರೋಪಿಯನ್ನು ನವೆಂಬರ್ 5ರಂದು ಪೊಲೀಸರು ಬಂಧಿಸಿ, 11 ವರ್ಷದ ಬಾಲಕನನ್ನು ರಕ್ಷಿಸಿದ್ದರು. ಆರೋಪಿ ಇಂದುಶೇಖರ್‌ನನ್ನು ಬಿಗಿ ಭದ್ರತೆಯಲ್ಲಿ ಸಕಲೇಶಪುರದ ಸಮೀಪದ ಮಾರನಹಳ್ಳಿ ಬಳಿಗೆ ಕರೆದೊಯ್ದು ಸ್ಥಳ ಮಹಜರು ನಡೆಸಲಾಯಿತು. ಕೈ ಕಾಲುಗಳನ್ನು ಹಗ್ಗದಿಂದ ಕಟ್ಟಿ, ಕೆಂಪು ಬೆಡ್‌ಶೀಟ್‌ಗಳಿಂದ ಸುತ್ತಿ ಗೋಣಿ ಚೀಲಗಳಲ್ಲಿ ತುಂಬಿ ಕಂದಕಕ್ಕೆ ಎಸೆಯಲಾಗಿತ್ತು.
ವಿಧಿ ವಿಜ್ಞಾನ ಪ್ರಯೋಗಾಲಯ (FSL), ಸುಕೋ ತಂಡ ಹಾಗೂ ಸ್ಥಳೀಯ ಪೊಲೀಸರ ನೆರವಿನಿಂದ ಶವಗಳನ್ನು ಹೊರತೆಗೆಯಲಾಗಿದ್ದು, ನಳಿನಿ ಅವರ ಸಂಬಂಧಿಕರು ಗುರುತು ಹಿಡಿದಿದ್ದಾರೆ. ಹಾಸನ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿದ ಬಳಿಕ ಮೃತದೇಹಗಳನ್ನು ವಾರಸುದಾರರಿಗೆ ಹಸ್ತಾಂತರಿಸಲಾಗುವುದು ಎಂದು ಹಿರಿಯ ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.
ಎಲ್ಲೆಲ್ಲಿ ಪತ್ತೆಯಾದವು ಮೃತದೇಹಗಳು?
ವಿಶೇಷ ತನಿಖಾ ತಂಡಗಳು 4 ದಿನಗಳಿಂದ ನೆರೆ ರಾಜ್ಯ ಹಾಗೂ ಅರಣ್ಯ ಪ್ರದೇಶಗಳಲ್ಲಿ ನಡೆಸಿದ ಶೋಧದ ಫಲವಾಗಿ ಶವಗಳು ಪತ್ತೆಯಾಗಿವೆ:
ನವೆಂಬರ್ 6: ನಂದಿ ಬೆಟ್ಟದಲ್ಲಿ ಶಿವಕುಮಾರ್‌–ದಿವ್ಯಾ ದಂಪತಿಯ ಪುತ್ರ ಪುನೀತ್‌ (7) ಶವ ಪತ್ತೆ.
ನವೆಂಬರ್ 7: ಸೇಲಂ ಸಮೀಪದ ಏರ್ಕಾಡ್‌ ಅರಣ್ಯದಲ್ಲಿ ಇಂದುಶೇಖರ್‌ನ ಪತ್ನಿ ಸುನಿತಾ ಹಾಗೂ ಅತ್ತೆ ರೂಪಾವತಿ ಶವ ಪತ್ತೆ.
ನವೆಂಬರ್ 8: ಮೈಸೂರಿನ ಚಾಮುಂಡಿ ಬೆಟ್ಟದ ತಪ್ಪಲಿನಲ್ಲಿ ಮತ್ತೊಬ್ಬ ಬಾಮೈದ ಶಿವಕುಮಾರ್‌ ಮತ್ತು ಅವರ ಪತ್ನಿ ದಿವ್ಯಾ ಶವಗಳು ಪತ್ತೆ.
ನವೆಂಬರ್ 9: ಶಿರಾಡಿ ಘಾಟ್‌ನಲ್ಲಿ ಬಾಮೈದ ಶಂಕರ್‌ ಮತ್ತು ಆತನ ಪತ್ನಿ ನಳಿನಿ ಶವಗಳು ಪತ್ತೆ.
ವಿಚಾರಣೆ ವೇಳೆ ಆರೋಪಿ ಆಘಾತಕಾರಿ ಸತ್ಯಗಳನ್ನು ಬಾಯ್ಬಿಟ್ಟಿದ್ದಾನೆ. ಹತ್ಯೆಗೆ ಸಂಚು ರೂಪಿಸಿದ ಬೆನ್ನಲ್ಲೇ ನಿದ್ರೆ ಮಾತ್ರೆ, ಹಗ್ಗ, ಸೆಲೋ ಟೇಪ್‌, ಪ್ಲಾಸ್ಟಿಕ್ ಕವರ್‌ ಹಾಗೂ ರಾಸಾಯನಿಕ ವಸ್ತುಗಳನ್ನು ಭಾಷ್ಯಂ ಸರ್ಕಲ್ ಸುತ್ತಮುತ್ತಲಿನ ಅಂಗಡಿಗಳಲ್ಲಿ ಖರೀದಿಸಿದ್ದ. ಶವಗಳನ್ನು ತುಂಬಲು ಯಶವಂತಪುರ ಆರ್‌ಎಂಸಿ ಯಾರ್ಡ್‌ನಿಂದ ಚೀಲಗಳನ್ನು ತಂದಿದ್ದ. ಒಬ್ಬೊಬ್ಬರನ್ನೇ ಕೊಲೆ ಮಾಡಿದ ಬಳಿಕ ಶವವನ್ನು ಸ್ನಾನದ ಕೋಣೆಗೆ ತೆಗೆದುಕೊಂಡು ಹೋಗಿ ರಕ್ತ ಸೋರಿದ ನಂತರ, ಹಗ್ಗದಿಂದ ಬಿಗಿಯಾಗಿ ಕಟ್ಟಿ ಚೀಲದಲ್ಲಿ ತುಂಬಿ ಕಾರಿನಲ್ಲಿ ತೆಗೆದುಕೊಂಡು ಹೋಗಿ ದೂರದ ಕಾಡುಗಳಲ್ಲಿ ಎಸೆದು ಬರುತ್ತಿದ್ದ.
ಅಕ್ಟೋಬರ್ 14ರಿಂದ ನವೆಂಬರ್ 3ರವರೆಗೆ ಆರೋಪಿಯ ಚಲನವಲನಗಳ ಜಾಡು ಹಿಡಿಯಲು 200ಕ್ಕೂ ಹೆಚ್ಚು ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ.
