ಕನ್ನಡ ಚಿತ್ರರಂಗದಲ್ಲಿ ಬಾಡಿ ಶೇಮಿಂಗ್ ವಿಚಾರ ಮತ್ತೆ ಚರ್ಚೆಗೆ ಕಾರಣವಾಗಿದೆ. ನಟಿ ಗೀತಾ ಭಟ್ ಅವರು ಮಾಡಿದ ಆರೋಪಗಳಿಗೆ ಸಂಬಂಧಿಸಿದಂತೆ ನಟ ಹಾಗೂ ನಿರ್ದೇಶಕ ಡಾರ್ಲಿಂಗ್ ಕೃಷ್ಣ ಮತ್ತು ನಟಿ–ನಿರ್ಮಾಪಕಿ ಮಿಲನಾ ನಾಗರಾಜ್ ನೀಡಿದ ಹೇಳಿಕೆಗಳ ಬಳಿಕ ಗೀತಾ ಭಟ್ ಮತ್ತೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ.
ಈ ಕುರಿತು ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಸ್ಪಷ್ಟನೆ ನೀಡಿರುವ ಗೀತಾ ಭಟ್, ತಾವು ಮೊದಲು ನಟಿಸಿದ್ದ ಧಾರಾವಾಹಿಯನ್ನು ಉದಾಹರಿಸಿ ತಮ್ಮ ಮೇಲೆ ಬಾಡಿ ಶೇಮಿಂಗ್ ಆರೋಪ ಮಾಡುತ್ತಿರುವವರಿಗೆ ಉತ್ತರ ನೀಡಿದ್ದಾರೆ. “ಆ ಧಾರಾವಾಹಿಯ ಕಥೆ ಒಬ್ಬ ದಪ್ಪ ಹುಡುಗಿ ಸಮಾಜದಲ್ಲಿ ಎದುರಿಸುವ ನೈಜ ಸಮಸ್ಯೆಗಳ ಬಗ್ಗೆ ಇತ್ತು. ಅದರ ಉದ್ದೇಶ ಬಾಡಿ ಶೇಮಿಂಗ್ ಅನ್ನು ಬೆಂಬಲಿಸುವುದಲ್ಲ,” ಎಂದು ಅವರು ತಿಳಿಸಿದ್ದಾರೆ.
“ಆ ಧಾರಾವಾಹಿಯಲ್ಲಿದ್ದ ಒಂದು ಡೈಲಾಗ್ ಜನಪ್ರಿಯವಾದದ್ದು ಕೇವಲ ಕಾಮಿಡಿಯಿಂದ ಮಾತ್ರ ಅಲ್ಲ. ಕೆಲವರು ಅದನ್ನು ಇತರರನ್ನು ಹಾಸ್ಯ ಮಾಡಲು ಬಳಸಿದ ಕಾರಣ ಅದು ಹೆಚ್ಚು ವೈರಲ್ ಆಯಿತು. ಅದು ಫೇಮ್ ಅಲ್ಲ, ಶೇಮ್,” ಎಂದು ಅವರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಇದಕ್ಕೂ ಮೊದಲು ಗೀತಾ ಭಟ್ ಲವ್ ಮಾಕ್ಟೇಲ್ ಚಿತ್ರದ ಒಂದು ಡೈಲಾಗ್ ಕುರಿತು ಅಸಮಾಧಾನ ವ್ಯಕ್ತಪಡಿಸಿದ್ದರು. ಸಿನಿಮಾದಲ್ಲಿ “ಹೂ ತರ ಇದ್ಲು, ಹೂಕೋಸ್ ತರ ಆಗಿದ್ದಾಳೆ” ಎಂಬ ಡೈಲಾಗ್ ಇರುವ ದೃಶ್ಯವನ್ನು ಥಿಯೇಟರ್ನಲ್ಲಿ ನೋಡಿದಾಗ ತಮಗೆ ಶಾಕ್ ಆಗಿತ್ತು ಎಂದು ಅವರು ಹೇಳಿದ್ದರು. ಈ ರೀತಿಯ ಡೈಲಾಗ್ ಸಿನಿಮಾದಲ್ಲಿದೆ ಎಂಬುದು ತಮಗೆ ತಿಳಿದಿರಲಿಲ್ಲ ಎಂದು ಕೂಡ ಅವರು ಆರೋಪಿಸಿದ್ದರು.
ಈ ಆರೋಪಗಳಿಗೆ ಪ್ರತಿಕ್ರಿಯೆ ನೀಡಿದ ನಟ ಹಾಗೂ ನಿರ್ದೇಶಕ ಡಾರ್ಲಿಂಗ್ ಕೃಷ್ಣ, “ಅದು ಬಾಡಿ ಶೇಮಿಂಗ್ ಮಾಡಲು ಬರೆಯಲಾದ ಡೈಲಾಗ್ ಅಲ್ಲ. ರೈಮಿಂಗ್ ಆಗಿ ಬರೆಯಲಾದ ಕಾಮಿಡಿ ಡೈಲಾಗ್ ಅಷ್ಟೇ. ಆ ದೃಶ್ಯದಲ್ಲಿ ಪಾತ್ರವಾದ ಆದಿ ಏನು ಅನುಭವಿಸುತ್ತಾನೆ ಎಂಬುದನ್ನು ತೋರಿಸಲಾಗಿದೆ,” ಎಂದು ಹೇಳಿದ್ದಾರೆ.
ಚಿತ್ರದ ನಿರ್ಮಾಪಕಿ ಮಿಲನಾ ನಾಗರಾಜ್ ಕೂಡ ಖಡಕ್ ಪ್ರತಿಕ್ರಿಯೆ ನೀಡಿದ್ದು, “ಸಿನಿಮಾದಲ್ಲಿ ಯಾವುದೇ ದೃಶ್ಯವನ್ನೂ ಕಲಾವಿದರಿಗೆ ತಿಳಿಸದೆ ಮಾಡಲಾಗುವುದಿಲ್ಲ. ಆಡಿಷನ್ ಮೂಲಕವೇ ಕಾಸ್ಟ್ ಮಾಡಲಾಗಿದೆ. ಪಾತ್ರ ಇಷ್ಟವಿಲ್ಲ ಅಂದ್ರೆ ಮಾಡಬಾರದು. ಯಾವುದನ್ನೂ ಮುಚ್ಚಿಟ್ಟು ಮಾಡಿಲ್ಲ,” ಎಂದು ಸ್ಪಷ್ಟಪಡಿಸಿದ್ದಾರೆ.
ಇನ್ನೂ ಮಾತನಾಡಿದ ಕೃಷ್ಣ, “ಗೀತಾ ಅವರು ಮೂರು ವರ್ಷಗಳ ಕಾಲ ಅದೇ ರೀತಿಯ ಕಥೆಯಿರುವ ಧಾರಾವಾಹಿಯಲ್ಲಿ ನಟಿಸಿದ್ದರು. ಈಗ ನಮ್ಮ ಸಿನಿಮಾದ ಒಂದು ದೃಶ್ಯಕ್ಕೆ ಮಾತ್ರ ತಕರಾರು ತೆಗೆದುಕೊಳ್ಳುವುದು ಹೇಗೆ? ಮೇಕಿಂಗ್ ವಿಡಿಯೋ ಕೂಡ ಯೂಟ್ಯೂಬ್ನಲ್ಲಿ ಇದೆ. ಯಾರನ್ನೂ ನೋಯಿಸುವ ಉದ್ದೇಶದಿಂದ ಆ ದೃಶ್ಯ ಮಾಡಿಲ್ಲ,” ಎಂದು ಹೇಳಿದ್ದಾರೆ. ಈ ನಡುವೆ ಮಿಲನಾ ನಾಗರಾಜ್, “ಕಾಮಿಡಿಯನ್ನು ಕಾಮಿಡಿಯಂತೆಯೇ ನೋಡಬೇಕು,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಈ ಹೇಳಿಕೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದ್ದು, ಅಭಿಮಾನಿಗಳು ಹಾಗೂ ನೆಟ್ಟಿಗರು ವಿಭಿನ್ನ ಪ್ರತಿಕ್ರಿಯೆಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಈ ವಿವಾದಕ್ಕೆ ಸಂಬಂಧಿಸಿದಂತೆ ಇನ್ನಷ್ಟು ಪ್ರತಿಕ್ರಿಯೆಗಳು ಹೊರಬರುವ ಸಾಧ್ಯತೆ ಇದೆ.
