ಸೌದಿಅರೇಬಿಯಾ: ಅಪಘಾತದಲ್ಲಿ ಸಾವಿಗೀಡಾಗಿದ್ದ ಆಂಧ್ರ ಪ್ರದೇಶ ಮೂಲದ ಕುಟುಂಬ- ರಿಯಾಧ್​ನಲ್ಲಿ ಅಂತಿಮ ಸಂಸ್ಕಾರ

ಸೌದಿಅರೇಬಿಯಾ: ಭೀಕರ ಕಾರು ಅಪಘಾತದಲ್ಲಿ ದುರಂತ ಸಾವಿಗೀಡಾಗಿದ್ದ ಆಂಧ್ರ ಪ್ರದೇಶ ಮೂಲದ ಕುಟುಂಬಕ್ಕೆ ಶುಕ್ರವಾರ ರಿಯಾಧ್​ನಲ್ಲಿ ಅಂತಿಮ ಸಂಸ್ಕಾರ ನಡೆಸಲಾಗಿದೆ.

ಅಪಘಾತದಿಂದ ಗುರುತಿಸಲಾಗದಷ್ಟು ಸುಟ್ಟು ಕರಕಲಾಗಿದ್ದರಿಂದ ಮೃತದೇಹಗಳನ್ನು ಶವಾಗಾರದಲ್ಲಿ ಇರಿಸಲಾಗಿತ್ತು. ಮೃತರ ಗುರುತನ್ನು ಡಿಎನ್‌ಎ ಪರೀಕ್ಷೆ ಮೂಲಕ ದೃಢಪಡಿಸಿಕೊಂಡ ಬಳಿಕ ಅಂತ್ಯಕ್ರಿಯೆ ನಡೆಸಲಾಗಿದೆ‌.

ಆಂಧ್ರದ ಚಿತ್ತೂರು ಮೂಲದ ಪ್ರಾಧ್ಯಾಪಕ ದಂಡು ಘೌಸ್ ಬಾಷಾ(35), ಪತ್ನಿ ತಬರಕ್​ ಸರ್ವಾರ್​ (31), ಮಕ್ಕಳಾದ ಮುಹಮ್ಮದ್​ ದಮಿಲ್​ ಘೌಸ್​ (2) ಮತ್ತು ಮುಹಮ್ಮದ್​ ಇಹಾನ್​ ಘೌಸ್​(4) ಆಗಸ್ಟ್ 26 ರಂದು ಉಮ್ರಾ ಮುಗಿಸಿ ಕುವೈತ್​ಗೆ ಮರಳುತ್ತಿದ್ದಾಗ ಭೀಕರ ಅಪಘಾತದಲ್ಲಿ ಮೃತಪಟ್ಟಿದ್ದರು.

ಮೃತದೇಹದ ಗುರುತು ಪತ್ತೆಯಾಗಿರಲಿಲ್ಲ. ಡಿಎನ್‌ಎ ಗುರುತಿನ ನಂತರ ಮೃತದೇಹಗಳ ಗುರುತು ಪತ್ತೆ ಹಚ್ಚಿ ಅಂತ್ಯಕ್ರಿಯೆ ನಡೆಸಲಾಗಿದೆ.

ಕುವೈತ್​ನ ಅಮೆರಿಕನ್ ವಿಶ್ವವಿದ್ಯಾನಿಲಯದಲ್ಲಿ ಕೆಲಸ ಮಾಡುತ್ತಿದ್ದ ದಂಡು ಘೌಸ್ ಬಾಷಾ, ಹೊಸದಾಗಿ ಖರೀದಿಸಿದ ಕಾರಿನಲ್ಲಿ ತಮ್ಮ ಕುಟುಂಬ ಸಮೇತ ಉಮ್ರಾಕ್ಕಾಗಿ ಸೌದಿ ಅರೇಬಿಯಾಕ್ಕೆ ಬಂದರು. ಉಮ್ರಾ ಮುಗಿಸಿ, ಕುಟುಂಬ ಕುವೈತ್‌ಗೆ ಹಿಂದಿರುಗುತ್ತಿದ್ದಾಗ ರಿಯಾದ್‌ನಿಂದ 120 ಕಿಲೋಮೀಟರ್ ದೂರದಲ್ಲಿ ದುರಂತ ಸಂಭವಿಸಿತ್ತು.