ಬೆಂಗಳೂರು:ಎಂಎಲ್‌ಎ ಟಿಕೆಟ್ ವಂಚನೆ ಕೇಸಿನಲ್ಲಿ ದೂರುದಾರ ಗೋವಿಂದ ಬಾಬು ಪೂಜಾರಿಯನ್ನು ಸಿಸಿಬಿ ವಿಚಾರಣೆಗೆ ಮತ್ತೆ ಕರೆದಿದೆ.ಹಣದ ಮೂಲದ ಬಗ್ಗೆ ವಿಚಾರಿಸಲು ಸಿಸಿಬಿ ತನಿಖೆ ನಡೆಸಲಿದೆ.
ಗೋವಿಂದ ಬಾಬು ಪೂಜಾರಿ ಹಣವನ್ನು ಕ್ಯಾಷ್ ನಲ್ಲಿ ಕೊಟ್ಟಿರುವುದರಿಂದ ಹಾಗೂ ಅದನ್ನು ಸಾಲ ಮಾಡಿ ಕೊಟ್ಟಿದ್ದೇನೆ ಎಂದು ಹೇಳಿದ್ದರಿಂದ ಆ ಹಣ ಎಲ್ಲಿಂದ ಬಂತು ಎಂದು ಸಿಸಿಬಿ ವಿಚಾರಣೆ ನಡೆಸಲಿದೆ.
ಎಂಎಲ್‌ಎ ಟಿಕೆಟ್ ವಂಚನೆ ಪ್ರಕರಣದ ಪ್ರಮುಖ ಆರೋಪಿ ಚಿತ್ರಾ ಕುಂದಾಪುರ ತನ್ನ ಸ್ನೇಹಿತನ ಸಹಕಾರದಿಂದ ತನಗಾಗಿ ಮನೆ ನಿರ್ಮಿಸಿಕೊಂಡಿದ್ದಳು ಎಂದು ಸಿಸಿಬಿ ಪೊಲೀಸರ ತನಿಖೆಯಿಂದ ತಿಳಿದುಬಂದಿದೆ.
ಉಡುಪಿಯ ಹಿರಿಯಡ್ಕ ಬಳಿ ಸುಮಾರು ಒಂದು ವರ್ಷದ ಹಿಂದೆ ಚಿತ್ರಾ ಅವರ ಸ್ನೇಹಿತ ಮತ್ತು ಪ್ರಕರಣದ ಸಹ ಆರೋಪಿ ಶ್ರೀಕಾಂತ್ ನಾಯಕ್ ಖರೀದಿಸಿದ 20-25 ಸೆಂಟ್ಸ್ ಜಾಗದಲ್ಲಿ ಮನೆ ನಿರ್ಮಿಸಲಾಗಿದೆ. 2 ಅಂತಸ್ತಿನ ಕಟ್ಟಡ ನಿರ್ಮಾಣಕ್ಕೆ ಚೈತ್ರಾ ಹಣ ನೀಡುತ್ತಿದ್ದರು ಎನ್ನಲಾಗಿದೆ.
ಸದ್ಯ ಮನೆಯ ಮೊದಲ ಮಹಡಿಯ ಕಾಮಗಾರಿ ಪೂರ್ಣಗೊಂಡಿದೆ. ಸ್ಥಳದಲ್ಲಿ ಎರಡು ಬೋರ್‌ವೆಲ್‌ಗಳನ್ನು ಕೊರೆಸಲಾಗಿದೆ. ನಿರ್ಮಾಣಕ್ಕಾಗಿ ಜಲ್ಲಿ, ಕಲ್ಲು ಮತ್ತು ಮರಳನ್ನು ಸ್ಥಳದಲ್ಲಿ ರಾಶಿ ಹಾಕಲಾಗಿದೆ.
ಚೈತ್ರಾ ಮತ್ತು ಶ್ರೀಕಾಂತ್ ನಾಯಕ್ ಬಂಧನದ ನಂತರ ನಿರ್ಮಾಣ ಕಾರ್ಯ ಸ್ಥಗಿತಗೊಂಡಿದೆ.
ತನಿಖೆಗಾಗಿ ಸಿಸಿಬಿ ತಂಡವೊಂದು ಉಡುಪಿಯಲ್ಲಿ ಬೀಡುಬಿಟ್ಟಿದೆ. ವಂಚನೆ ಪ್ರಕರಣದ ಆರೋಪಿಗಳು ಠೇವಣಿ ಇಟ್ಟಿರುವ ಸಹಕಾರಿ ಸೊಸೈಟಿಯಲ್ಲಿ ಶನಿವಾರ ತಂಡ ತನಿಖೆ ನಡೆಸಿ ಸಾಕ್ಷ್ಯ ಸಂಗ್ರಹಿಸಿತ್ತು. ಬೈದೂರು, ಕುಂದಾಪುರ, ಉಡುಪಿ ತಾಲೂಕು ಸೇರಿದಂತೆ ವಿವಿಧೆಡೆ ಶೋಧ ನಡೆಸಲಾಗಿದೆ.
ಚೈತ್ರಾ ಅವರು ಶ್ರೀಕಾಂತ್ ನಾಯಕ್ ಹೆಸರಿನಲ್ಲಿ ಅಪಾರ ಪ್ರಮಾಣದ ನಗದು ಠೇವಣಿ, ಭೂಮಿ ದಾಖಲೆಗಳು, ಚಿನ್ನಾಭರಣಗಳು ಮತ್ತು ಇತರ ಆಸ್ತಿಗಳನ್ನು ಇಟ್ಟುಕೊಂಡಿರುವ ಶಂಕೆ ಇದೆ.
ಇನ್ನು ಕೆಲವು ದಿನಗಳ ಕಾಲ ಸಿಸಿಬಿ ಪೊಲೀಸರು ಉಡುಪಿಯಲ್ಲಿದ್ದು ಸಾಕ್ಷ್ಯ ಸಂಗ್ರಹಿಸಲಿದ್ದಾರೆ.
